飛行紀錄：國泰航空波音777–300ER頭等艙｜LHR - HKG

Flight Info 航班資料

國泰航空CX252
倫敦希思羅機場（LHR）- 香港國際機場（HKG）
2022年12月28日（星期三）
原定起飛時間（實際起飛時間）：11:15（11:58）
原定到達時間（實際到達時間）：07:40（07:44）
飛行時間：11小時46分鐘
機種：波音777–300ER（B-KPQ）
座位：2A

Ticketing 出票

今次我買嘅係挪威奧斯陸經英國倫敦返香港嘅單程機票，先喺Google Flights到查飛，然後因為去國泰官網search唔到呢張機票，所以今次經Amex Travel用HKD9,649訂咗呢張機票，以聖誕旺季嚟講，價錢係相當唔錯。出票之後再用50,000亞洲萬里通侯補頭等升艙。受惠於國泰喺2022年11年開始重新將喺疫情期間封存一段時間嘅波音777–300ER機隊投入服務，侯補名單好快就通過咗。

買機票嘅時候有個小技巧，記得用「多城市（Multi-city）」分兩程機OSL-LHR//LHR-HKG咁去搵，而唔係揀「單程（One-way）」OSL-HKG，否則系統只會搵到經由國泰其他歐洲航點（e.g.巴黎、法蘭克福等）轉機到香港嘅機票，價錢比我呢個方法買貴多少少。

以「單程（One-way）」搜尋嘅結果，搵唔到經希思羅機場轉機。

以「多城市（Multi-city）」搜尋嘅結果。

當中慳咗嘅有近一半係燃油附加費。好難想像離境稅出名貴嘅希思羅機場喺同一個票價基礎（Base fare）上加加埋埋可以比其他歐洲機場轉機平。

左邊（OSL-CDG-HKG）票價HKD 7,458 + 稅項 HKD2,189；右邊（OSL-LHR-HKG）票價HKD 6,697 + 稅項 HKD2,118。

Check-in 辦理登機

起飛當日由於英國鐵路工潮持續，所以我都預鬆咗時間去機場。朝早約07:45左右到達倫敦希思羅機場第三航廈嘅時侯，整個terminal已經人頭湧湧。但由於時間尚早，國泰辦理登機嘅櫃檯唔使等，好快就搞掂辦理登機手續。頭等同商務艙嘅乘客可以使用希思羅機場嘅fast track安檢，雖然係「fast track」，但由於旅客數目太多，所以都等咗半個鐘左右先完成安檢。

頭等辦理登機手續櫃檯。

一張機票，另外一張貴賓室邀請卡。

Lounge 貴賓室

Terminal 3作為寰宇一家喺希思羅機場嘅大本營，入面一共有5個可用嘅貴賓室，當中包括澳洲航空、美國航空、英國航空，以及國泰航空。國泰可以話係以上提及幾個貴賓室之中環境同食物質素最好嘅一個。商務同頭等貴賓室共構喺同一個區域，而進入頭等區域嘅時候，並未有工作人員再檢查登機證，簡單嚟講就係自出自入。

貴賓室水牌。喺T3出發經過安檢後一定會經過呢個位置，國泰同澳航轉左，英航同美航轉右。

國泰貴賓室入口，木系裝潢帶有濃厚嘅東方韻味。

用餐區嘅座位似茶記卡位佈局。

西式早餐食品。

貴賓室後方位置較為寧靜，而座椅選擇上都係私隱度較高嘅小梳化，適合想靜靜哋休息嘅旅客。

頭等艙貴賓室區域，比商務艙嗰邊少啲人。

Boarding 登機

本來話10:30會公佈登機閘口，但最後等到11:00先見到邊個閘口。因為登機時間係11:15，所以沿路行過去就好似見到個個動物大遷徙咁趕過去個閘口。登機前，地勤開咪提咗兩次大家因為香港防疫要求所以上機必須要帶口罩。

本日登機閘口係42號閘口。

Cabin 機艙

國泰波音777–300ER機隊平均機齡大約10.2年（至2022年12月為止），但頭等艙保養得宜，踏入機艙並唔會有舊嘅感覺。當中唯一覺得有歲月痕跡嘅，大概只有座位嘅一啲小細節。頭等艙以1–1–1佈局，並不設艙頂置物櫃，令只有兩行嘅頭等艙唔會顯得狹小焗促。

A位望向D、K位視角。

頭等艙一簾之隔嘅後面就係Row 11–12商務艙嘅mini cabin。

一入機艙門就係1A。

頭等艙座位上方並冇艙頂置物櫃，所以機艙有充足嘅空間感。

Seat 座位

對於呢個頭等座位嘅第一感覺係：闊！好闊！超級闊！相比喺商務艙座位嘅21寸闊度，頭等足足有36寸。其次，雖然唔似其他新一代頭等艙產品咁有趟門，但你坐落去嘅時侯絕對唔會覺得私隱度不足，原因係周圍嘅partition都延伸到好前，再加上座位與座位之間嘅區間分得好開，所以私密性十足。就算以現時嘅標準嚟睇佢都仲係一款具競爭性嘅產品，可想而知當年佢係一個幾有前瞻性嘅優質頭等艙產品。

除咗咕𠱸，頭枕位置亦以魔術貼痴多咗個枕頭提升舒適度。

座位正對面亦係一個座位，用餐嘅時侯可以邀請同機嘅同伴面對面咁一齊食飯。

腳墊位置上已放置咕𠱸同毛氈。

登機時座位放置一支樽裝水、「國泰護航」防疫套裝同介紹頭等香檳Krug嘅介紹卡（綠色嗰張）。

座位右邊有一盞閱讀燈同safety card。

座位右側嘅手抽拉落嚟就可以當成扶手咁用。

見到有條閃電毛，其實都幾趕客。

支水左邊有個托，之前會放支鮮花喺到，但而家唔知係咪冇咗。

呢個儲物位置大概可以放得落手提電話、眼鏡等等嘅小型物品。

觸控式屏幕控制座位嘅調較同燈光，但畢竟佢都係上一代嘅產物，反應就唔係好靈敏。

救生衣可以由座位左邊拉出，旁邊係娛樂系統插耳筒嘅位置。

有一個三腳插同USB插頭可以叉電。

頭等座位嘅闊度有36寸，比商務足足多出15寸。

A位同K位嘅乘客各自有3隻窗嘅景觀。

坐喺個位入面就算冇門都完全見唔到其他乘客。

頭等有提供turndown服務，空中服務員喺用餐後就問需唔需要鋪床。

大大個枕頭，爽！

Amenities 備用品

起飛前，空中服務員向每位乘客分別派出英國品牌bamford嘅過夜包，包括牙膏、牙刷、漱口水、眼罩、耳塞、面部噴霧、保濕霜、潤唇膏，都係同商務艙一樣嘅餡，唯獨是個外盒係唔同設計同實淨啲。另外亦會先詢問你需要嘅尺碼，再派發由國泰同PYE跨品牌合作嘅睡衣套裝。

bamford過夜包。

PYE睡衣套裝，包括有睡衣、睡褲、一對拖鞋以及眼罩。

Bose嘅主動式降噪耳機。

降落前，空中服務員又派出一樽4粒嘅JING茶作為紀念品。

Food & Beverages 餐膳

講到國泰頭等艙同商務艙最明顯嘅分別，就一定係餐飲。除咗有Krug香檳、魚子醬呢啲比較出名嘅單品之外，亦都有商務艙鮮有出現嘅中湯同中式糖水。

起飛前除咗有welcome drink之外，亦有一杯JING嘅氣泡茶提供。

本身我訂咗嘅素食餐冇沙律提供，空中服務員過嚟點餐嘅時侯特別同我講會補返個素嘅沙律畀我，賣相唔錯！

呢個椰菜花忌廉湯係我成程機最有印象嘅一樣嘢，個羽衣甘藍脆脆加埋個酸忌廉，成件事好夾，係超超超超超好味！

東方素食餐，味道就…同我飛econ食嗰個特別餐冇乜分別。

飯後果。

飯後有一盒兩粒Praline送。

早餐方面，瞓到降落前大約三個鐘，空中服務員見我醒咗就問我需唔需要食咗先。感覺上呢部分係比較人性化啲嘅，見你幾時醒就問你食唔食咗先，因為當我開緊餐嘅時候，隔離左右幾位乘客都仲未起身。

主餐上之前有個粟米片或museli，亦有一個自選麵包可以揀。

個主餐係碗粉絲定米粉，味道不過不失。

Lavatory 洗手間

頭等艙一共有2個廁所供6位乘客使用，兩個都係位於機艙前面。左邊嗰個廁所我會稱之為係比較proper嘅頭等廁所，一嚟嗰個廁所大啲，二嚟入面嘅一啲細節位（e.g.洗手盤、水龍頭）都有唔同。簡單嚟講，右邊嗰個廁所只係一個有抹手毛巾嘅econ廁所。

機身弧度稍為限制咗廁所嘅空間。

廁所空間以頭等艙嘅標準嚟講唔算等別大。

除咗一般嘅面紙同手抹手紙外，亦有抹手毛巾提供。

洗手間用嘅同樣係國泰嘅合作品牌bamford。

Entertainment 娛樂

娛樂系統嘅內容方面，喺之前嘅review已經同大家分享過，詳情可以睇返飛行紀錄：國泰航空A350–1000商務艙｜FRA — HKG。但係國泰喺777–300ER機隊嘅呢個屏幕，觸控反應就唔係咁靈敏，畢竟佢都係上一代嘅硬件。除此之外，國泰有提供機上wifi服務，每位頭等嘅乘客都會有一個可供一部裝置上網嘅免費flight pass（價值USD19.95）。實測碌IG、睇YouTube等等完全夠用。

每位頭等乘客都有complimentary嘅wifi pass。

機上wifi有兩個唔同plan，但都只限一部裝置使用。輸人優惠碼之後即可減去費用。

實測網速下載有36.7Mbps、上載2.99Mbps，一般使用完全足夠。

Verdict 總結

對於唔飲酒、唔食魚子醬嘅朋友，我會建議坐返商務都已經好夠。成個頭等嘅體驗的而且確係同商務係有分別，而當中嘅大部份僅僅係反映喺餐飲同更闊嘅座位上。在我個人而言又未覺得（不論現金價值/里數）值兩者嘅差價。另外頭等嘅時儲物空間略嫌唔夠商務艙方便，講緊嘅唔係儲物空間唔夠多，而係頭等每位乘客只有一個集中放嘢嘅儲物櫃，唔似商務喺個位傍邊就有兩三個可以放例如手袋、細背囊嘅空間。話雖如此，成程機嘅其他所有嘢，我都覺得非常滿意！

3個亮點：

1. 有免費wifi，而且瀏覽速度一流
2. 座位夠闊、私隱度夠高
3. 餐飲一流（如果你飲酒食魚子醬嘅話）

3個不足：

1. 儲物空間唔夠方便
2. 座位清潔麻麻哋，我到而家仲記得個位有條閃電毛
3. 娛樂系統硬件（個touch screen）反應略慢