飛行紀錄：新加坡航空777–300ER商務艙｜HKG — SIN

Flight Info 航班資料

新加坡航空SQ895
香港國際機場（HKG）- 新加坡樟宜機場（SIN）
2022年6月12日（星期日）
起飛時間：18:55（18:50）
到達時間：22:01（22:40）
飛行時間：3小時6分鐘
機種：波音777–300ER（9V-SWI）
座位：23F

Ticketing 出票

今次嘅機票係以新航KrisFlyer里數兌換。2022年6月期間新航每日來往香港有兩班航班，分別以空中巴士A350–900以及波音777–300ER客機營運。由於香港出發嘅旅客唔多，所以幾乎每日都可以用最優惠嘅business promo兌換商務艙機票，例如今次出票嘅成本就只需要21,350 KrisFlyer里數加HKD 335稅項。

Check-in 辦理登機

新航喺登機前48小時可以網上辦理登機，另外當日嘅航班可以喺起飛前6–72小時內經mySQupgrade用HKD 5,844升級頭等艙。到達機場後，由於當日商務艙嘅乘客唔多，而且我已經預先填妥入境需要嘅Singapore Arrival Card (SGAC)，所以用咗5–10分鐘左右就完成辦理登機。我問地勤想現場加錢上頭等要幾錢，職員就話因為我係兌換機票所以唔可以加錢升頭等（即係mySQupgrade嘅offer喺現場係冇嘅）。

Lounge 貴賓室

新航喺香港雖然有自家營運嘅SilverKris Lounge，但係礙於疫情關係一直未有開放，所以商務同頭等嘅乘客都係使用位於Gate 60嘅Plaza Premium Lounge。當日同時段使用呢個lounge嘅只有呢班機嘅乘客，所以唔太迫。而食物同飲品嘅選擇都係一般PP lounge嘅嘢，不過不失咁啦…

Boarding 登機

雖然寫嘅登機時間係18:20，但我哋18:10由lounge去到閘口已經上咗一半乘客。機艙接駁咗兩條機橋，頭等同商務艙乘客共用一條機橋登機。

今次坐嘅係星空聯盟特別塗裝嘅波音777–300ER（機身編號：9V-SWI）。

Cabin 機艙

商務艙一共有48個座位，以1–2–1排序，分佈前後兩個區域。前排3行12個座位、後面12行共36個座位。要注意嘅係，第19行同21行嘅A、K位係冇窗嘅，所以想揀邊窗口位就記得避開呢兩行嘞！另外，由於D、F兩個座位上方不設行李架，所以即使新航嘅座位較為高身都唔會令整個機艙有太焗促嘅感覺。

Seat 座位

新航777–300ER選用嘅座位係由英國JPA Design設計、日本廠商JAMCO生產嘅「Diamond Seat（ダイヤモンドシート）」，闊28吋、長78吋。同常見嘅反魚骨、交錯式座位佈局唔同，呢款座位全部都係面向前方，而A、K位亦冇分較近窗或較近走廊，分佈非常平均。

今次嘅座位23F，第一印象就係個位非常之闊。

座位左邊係最主要嘅儲物空間，但都只係放得落手提電腦或平板電腦等等嘅雜物。呢個位置仲有一組可調較光暗嘅閱讀燈、插蘇位、HDMI插頭、兩組USB叉電同埋一個上世紀嘅產物 — iPod插頭。

IFE嘅遙控，我未喺好接受到2022年嘅新航係冇輕觸式屏幕。

餐枱旁邊有個細細哋嘅儲物位，入面預先放咗一支樽裝水喺度。

呢個tray table放得非常之尷尬，就算你隻手輕輕晾上去佢都好容易彈起咗，搞到你個人想向左挨嘅時候都唔知點落手好。

安全卡同嘔吐袋。細心睇可以見到個位仲留咗上手幾條頭髮喺到，清潔程度要扣分。

座位喺完全躺平嘅時候需要打斜瞓。

座位底下有個可以放到鞋或袋嘅位置，但如果將座位躺平後嘅呢個儲物空間就得物無所用。

座位右側有另一組可以調較唔同光暗嘅閱讀燈。

所有座位嘅操控同插耳筒嘅位置都喺個位嘅右手邊。

D、F位中間亦有一個小隔板，向前拉開即可分隔開兩個座位嘅視線範圍，提升私隱度。

IFE旁邊有幾個位置，左上角拉開係一個儲物空間，拉開後會有燈，大概放到一個手袋大細嘅物品。下面係放飲品嘅位置，而右下角拉開就係一塊鏡嚟嘅。

Amenities 備用品

新航嘅商務艙一向未有提供amenity kit，但由2021年起改為可以問空中服務員拎。但我今次居然。。。唔記得問！！

Food & Beverages 餐膳

航班當日仍然未恢復Book the Cook（「名廚有約」）服務，但仍然可以喺網上預先選擇餐點。今次都係預訂咗蛋奶素食餐，前菜係羊奶芝士沙律、主菜係烤雜菜gnocchi。食物質素同份量唔錯，但上餐速度就略嫌慢咗啲。

Lavatory 洗手間

新航嘅777–300ER客機一共有三個洗手間畀商務艙乘客使用，全部位於galley位置左右兩側：左邊兩個、右邊一個，而三個洗手間嘅空間都偏窄。

梳洗用品同amenity kit一樣野係由英國牌子Penhaligon’s提供。

腳踏式垃圾桶。

Entertainment 娛樂

新航機上娛樂系統嘅屏幕非常大，足足有18吋，但唯一不足之處就係冇輕觸式屏幕。另外機上亦提供wifi服務，唔同艙等可以免費使用嘅用量各有不同，而計算的單位亦有差異。頭等艙乘客享有全程免費wifi；商務艙乘客以100MB數據用量為限；特選經濟艙同經濟艙就係最多兩小時嘅訊息用量。

Verdict 總結

總括今次嘅旅程，我認為新航嘅服務水平比佢哋嘅硬件略勝一籌。硬件方面，座位雖然好闊，但由於冇得直接調較為平躺嘅狀態（需要反低張櫈），除咗唔方便之外我都係覺得張櫈無論點較都去唔到一個好舒適嘅位置。而最尷尬同唔方便嘅就係個好容易唔小心打開咗嘅tray table。雖然硬件唔係好啱我心水，但服務水平方面絕對值得一讚。例如同我一齊飛嘅媽咪英文唔係講得太流利，新航嘅空姐反而好努力用唔鹹唔淡嘅廣東話嘗試同我媽溝通，而且見我媽係老人家會經常主動過嚟關心。下次有機會希望可以再試吓新航嘅長途機再同大家分享！